Umwana w’umuhungu uri mu kigero cy’imyaka 10 na 12 y’amavuko yafashe umwanya yubaka yikinira inyubako ya Kigali Convention Center yifashishije ibumba, gusa nyuma yaho ifoto ye ikwirakwiye ku mbuga nkoranyambaga, ubuyobozi bwa hoteli ya Radisson Blu ikorera muri iyi nyubako bwiyemeje kumushaka.
Iyi foto igaragaza uyu mwana ari imbere y’iyi Kigali Convention Center yubatse mu ibumba, yatangiye gusakara hirya no hino ku mbuga nkoranyambaga kuva mu gitondo cyo kuri uyu wa Gatatu tariki ya 28/06/2017, ndetse nyuma yo guhererekanywa n’abantu benshi, ubuyobozi bwa Radisson Blu bubinyujije kuri Twitter na bwo bwagaragaje ko bwatangajwe n’impano idasanzwe y’uyu mwana ari nayo mpamvu bwahise bwiyemeza kumushaka nubwo batahise batangaza icyo bamushakira.
Ifoto y'uyu mwana yasakaye ahantu hose kubera ubuhanga n'ubushake yagize mu kwigana iyi nyubako ifatwa nk'ikirango cy'ubwiza bwa Kigali y'ubu
Hoteli ya Radisson Blu yagaragaje ko yifuza guhura n'uyu mwana, inavuga ko izashimira buri wese uzabiyifashamo
Radisson Blu bagize bati " Inzozi nini zitangirira ku bintu bito, uyu mwana yabikoze neza!"
Kigali Convention Center ni imwe mu nyubako nshya mu Rwanda z'ikitegererezo, akaba ari naho habarizwa Radisson Blu hotel
Eng
RSS 
TANGA IGITECYEREZO