Umunyana Shanitah ni umwe mu bakobwa 20 bari guhatanira ikamba rya Nyampinga w’u Rwanda w’umwaka wa 2018, akaba umwe mu bahagarariye intara y’Amajyepfo muri iri rushanwa. Amakuru agezweho kuri uyu mukobwa Umunyana Shanitah ni uko yasengewe na Bishop Rugagi Innocent akamwaturaho gutwara ikamba rya Miss Rwanda 2018.
Bishop Rugagi Innocent ni umuyobozi mukuru w’itorero Redeemed Gospel church mu Rwanda, akaba azwi cyane mu gukora ibitangaza aho bivugwa ko asengera abarwaye SIDA, Cancer n’izindi ndwara zikomeye, zigakira. Kuri iki Cyumweru tariki 4 Gashyantare 2018 mu materaniro yabereye muri Redeemed Gospel church, Bishop Rugagi yasengeye Umunyana Shanitah w'imyaka 18 y'amavuko amusabira ku Mana kugira ngo azatware ikamba rya Miss Rwanda 2018.
Umunyana Shanitah ni umwe muri 20 baherutse gutorerwa gukomeza muri Miss Rwanda 2018
Amakuru agera ku Inyarwanda avuga ko Bishop Rugagi yahanuriye Umunyana Shanitah ko ari we uzatwara ikamba ndetse ahita asaba n’abakristo kumushyigikira bakamutora nibura inshuro 600 ku munsi. Ibi byatumye twegera Umunyana Shanitah tumubaza uko byagenze n’aho byaturutse kugira ngo asengerwe na Bishop Rugagi Innocent. Umunyana Shanitah yabwiye Inyarwanda.com ko asanzwe ari umukristo mu itorero Redeemed Gospel church rikuriwe na Bishop Rugagi Innocent.
Bishop Rugagi umuyobozi mukuru wa Redeemed Gospel church
Ku bijyanye n’uko yasengewe, Miss Umunyana Shanitah upima metero 1.84 n’ibiro 55 yavuze ko Bishop Rugagi Innocent yari yagiye gusenga bisanzwe nuko Bishop Rugagi aramuhamagara amukuye mu bakristo, amusaba kujya imbere kugira ngo amusengere azitware neza mu irushanwa rya Miss Rwanda 2018. Umunyana Shanitah yavuze ko Bishop Rugagi atigeze amuhanurira gutwara ikamba ahubwo ngo yamusabiye ku Mana kuzatwara ikamba. Yagize ati: “Sinavuga ko ari muri ubwo buryo (kumpanurira). (Bishop Rugagi) yarampagurukije njya imbere, aransengera,….."
Bishop Rugagi ubwo yasengeraga Umunyana Shanitah
Inyarwanda.com twabajije Umunyana Shanitah niba afite icyizere cyo kuzatwara ikamba rya Miss Rwanda 2018, aduhamiriza ko yizeye ijana ku ijana kuzegukana ikamba. Yagize ati: “Mfite icyizere ijana ku ijana cyo kuzatwara ikamba.” Twabibutsa ko Miss Rwanda 2018 azamenyekana tariki ya 24 Gashyantare 2018 mu gikorwa nyirizina kizabera muri Auditorium ya Radisson Blu muri Kigali Convention Center, akazasimbura Miss Iradukunda Elsa Miss Rwanda 2017.
ANDI MAFOTO YA SHANITAH UMUNYANA
Bishop Rugagi yifuza ko Umunyana Shanitah yaba Miss Rwanda 2018
Shanitah Umunyana (ibumoso)
Shanitah Umunyana (nimero 1)
Umunyana Shanitah afite icyizere 100 ku 100 cyo gutwara ikamba
Eng
RSS 
TANGA IGITECYEREZO