Ubuzima bwo mu mijyi ya Paris, Hong Kong na Singapour buhenze kurusha mu yindi yose ku isi muri 2019

Ni icyegeranyo  ngarukamwaka gikorwa n’ikinyamakuru The economist. Kuri iyi nshuro ni ubwa mbere imijyi itatu ihuriye ku mwanya wa mbere mu kugira ubuzima buhenze cyane mu myaka 30 ishize itsinda ry'ubutasi ry'ikinyamakuru The Economist cyo mu Bwongereza rimaze rikora iki cyegeranyo ngaruka mwaka.

Iki cyegeranyo kigereranya ibiciro by'ibicuruzwa bikenerwa cyane mu buzima busanzwe, nk'igiciro cy'umugati, mu mijyi 133. Ibi biciro  bigereranwa n’ibyo  mu mujyi wa New York muri Leta Zunze Ubumwe z'Amerika ufatwa nk'ifatizo.

Umujyi wa Paris, wari ku mwanya wa kabiri mu guhenda cyane ku rutonde rwo mu mwaka ushize wa 2018, ni umwe mu mijyi ine yo ku mugabane w'Uburayi iza mu myanya 10 ya mbere kuri uru rutonde rw'uyu mwaka.Roxana Slavcheva wanditse iki cyegeranyo, avuga ko Paris yamye iza mu myanya 10 ya mbere y'imijyi ihenze cyane ku isi guhera mu mwaka wa 2003 , kuri ubu ngo Paris yihagarariye kugira ibiciro biri hejuru cyane by'inzu zo guturamo, kwiyitaho no kwidagadura.

Agareranya ibiciro ku isoko i Paris no yindi mijyi uyu mushakashatsi yagize ati”Nk'urugero, gutunganya imisatsi y'umugore biciriritse biri ku giciro cy'amadolari 119.04 y'Amerika aha i Paris, mu gihe i Zurich mu Busuwisi bitwara amadolari 73.97 y'Amerika naho i Osaka mu Buyapani bigatwara amadolari 53.46 y'Amerika”

Urutonde rw’imiijyi ya mbere ihenze cyane kuyibamo kurusha iyindi ku isi. Iyi mijyi ikurikirana muri ubu buryo:

1. Singapour (muri Singapour)

1. Paris (mu Bufaransa)

1. Hong Kong (mu Bushinwa)

4. Zurich (mu Busuwisi)

5. Genève (mu Busuwisi)

5. Osaka (mu Buyapani)

7. Seoul (muri Koreya y'epfo)

7. Copenhagen (muri Denmark)

7. New York (muri Leta Zunze Ubumwe z'Amerika)

10. Tel Aviv (muri Israel)

10. Los Angeles (muri Leta Zunze Ubumwe z'Amerika)

Imijyi 10 ya mbere ihendutse cyane kuyibamo ku isi. Iyi mijyi ikurikirana muri ubu buryo:

1. Caracas (muri Venezuela)

2. Damascus (muri Syria)

3. Tashkent (muri Uzbekistani)

4. Almaty (muri Kazakhstani)

5. Bangalore (mu Buhinde)

6. Karachi (muri Pakistani)

6. Lagos (muri Nigeria)

7. Buenos Aires (muri Argentine)

7. Chennai (mu Buhinde)

8. New Delhi (mu Buhinde)

Src:The economist