Umunyabigwi Xavi ku muryango winjira muri FC Barcelona gusimbura Koeman wirukanwe

Nyuma y’iminota micye FC Barcelone itsinzwe na Rayo Vallecano igitego 1-0 muri shampiyona ya Espagne, hasohotse itangazo ry’ubuiyobozi bukuru bw’iyi kipe busezerera umutoza Ronald Koeman kubera umusaruro mucye, bumushimira igihe yari amaze akorera ikipe.

Nyuma yo kwirukana Koeman, havuzwe amazina atandukanye y’abatoza bashobora gusimbura uyu muholandi barimo Xavi wagize amateka meza ubwo yakiniraga iyi kipe, Eric Ten Hag utoza Ajax ndetse na Antonio Conte.

Gusa amakuru ava imbere mu buyobozi bw’iyi kipe y’i Catalonia, avuga ko ibiganiro bigeze kure hagati ya Barcelona na Xavi kugira ngo ave muri AL Sadd yo muri Qatar atoza, aze kuzahura umusaruro wa FC Barcelona igeze habi.

Umunyamakuru Fabrizio Romano ukunda gukurikiranira hafi ruhago ya Espagne, avuga ko mu makuru akura mu bayobozi ba hafi ba Barcelona ari uko mu masaha macye ari imbere Xavi aza gutangazwa nk’umutoza mushya wa FC Barcelona.

Xavi wakoze amateka muri FC Barcelona yabereye kapiteni igihe kirekire ubwo yayikiniraga, arashaka kuyikoramo amateka nk’umutoza nkuko byagendekeye mugenzi we Zinedine Zidane wabikoze muri mukeba Real Madrid.

Akinira Barcelona, Xavi yayihesheje ibikombe 25, birimo umunani bya shampiyona ya Espagne na bine bya UEFA Champions League.

Mu myaka ibiri amaze atoza Al Sadd, Xavi amaze kuyihesha ibikombe Birindwi birimo n’igikombe cya shampiyona yegukanye mu mwaka w’imikino wa 2020/21.

Xavi byitezwe ko atangazwa nk'umutoza mushya wa FC Barcelona

Xavi yagize ibihe byiza akinira FC Barcelona