Bayer Leverkusen yanditse amateka mashya ku Mugabane w'u Burayi

Ku munsi w'ejo kuwa Kane nibwo hakinwaga imikino ya 1/2 yo kwishyura y'irushanwa rya UEFA Europa League . Ikipe ya Bayer Leverkusen yari yakiriye AS Roma kuri  Bay Arena nyuma y'uko mu mukino ubanza yari yayitsindiye iwayo ibitego 2-0.

AS Roma yaje muri uyu mukino isabwa gutsinda nibura ibitego 3-0 kugira ngo ibe yakomeza ndetse yewe igera ku munota 81 ifite icyizere bitewe nuko yari ifite ibitego 2-0 bya Leandro Parades ku munota wa 43 n'uwa 66 ariko byaje guhinduka Bayer Leverkusen iyisubirana inyuma iyitsinda nayo ibitego 2 bituma banganya.

Ni ibitego bya myugariro Manchini witsinze ku munota wa 82 ndetse na Josip Stanisic ku munota wa 90+1. 

Usibye kuba Bayer Leverkusen yahise igera ku mukino wa nyuma isezereye AS Roma ku kinyuranyo cy'ibitego 4-2 yahise inakora amateka ku Mugabane w'u Burayi yo kuba ikipe imaze imikino myinshi itaratsindwa umukino n'umwe.

Iyi kipe itozwa n'umunya-Espagne, Xabi Alonso imaze imikino 49 idatsindwa mu marushanwa yose ikaba iheruka gutsindwa ubwo yakinaga umukino wa nyuma muri shampiyona ya Bundesliga ya 2022-2023 batsindwa na VfL Bochum ibitego 3-0.

Ikipe yari ifite aka gahigo ko kumara imikino myinshi idatsinzwe ni Benfica yo muri Portugal yo yamaze imikino 48 mu mezi 15 mu kuva mu kwezi kwa 12 mu 1963 kugeza mu kwezi kwa 2 mu 1965.

Muri rusange,muri iyi mikino 49 Bayer Leverkusen imaze idatsindwa ,yatsinzemo 40 inganyamo 9 gusa,  ishobora no gukora amateka yo gutwara ibikombe 3 idatsinzwe ,haba icya shampiyona yamaze kwibikaho,icya Europa League yageze ku mukino wa nyuma ndetse n'icy'igokombe cy'igihugu cy'u Budage.

Ikipe ya Bayer Leverkusen yakoze amateka ku Mugabane w'u Burayi yo kumara imikino myinshi idatsinzwe