Bitegure guhemburwa! Arsene Tuyi yateguje igitaramo cy’amateka yatumiyemo Christian Irimbere

Ku nshuro ya gatanu, umuramyi umaze kubaka izina mu muziki wo kuramya no guhimbaza Imana mu Rwanda wamenyekanye nka Arsene Tuyi agiye kongera gutaramana n’abakunzi b’ibihangano bye mu gitaramo yatumiyemo n’abandi bahanzi barimo Christian Irimbere.

Kuri iyi nshuro, iki gitaramo kizabera kuri Evangelical Restoration Church i Masoro ku Cyumweru tariki 19 Gicurasi 2024, guhera ku isaha y’i saa Kumi z’umugoroba.

Mu kiganiro yagiranye na InyaRwanda, Arsene Tuyi ukunzwe mu ndirimbo 'Impamvu y'ibyishimo' yatangaje ko abazitabira iki gitaramo yise ‘Pentecost Hymn’ bazafatanya kwizihiza Umwuka Wera, imbaraga n’imirimo bye.

Agaruka ku mpamvu yongeye gutegura iki gitaramo yagize ati: “Nabonye rimwe na rimwe twibagirwa Umwuka Wera ko nawe ari umufasha twahawe iteka. Rero numva nawe dukwiriye kumuha icyubahiro, tugashima ku bwe kandi tugaterana ku bwe.”

Arsene Tuyi yatangaje ko azafatanya na Christian Irimbere, asobanura ko impamvu atatumiye abahanzi benshi kuri uriya munsi ari ukubera ko yifuza kuzagira umwanya uhagije cyane wo kutaramira abazaba bitabiriye igitaramo cye.

Mu gihe igitaramo kibura icyumweru kirenga ngo kibe, uyu muhanzi yatangarije InyaRwanda ko imyiteguro yacyo igeze ku kigero cya 80%, ‘hasigaye guhuza ibintu bimwe na bimwe no kugera ku munsi nyirizina.’

Uyu muramyi yasabye abantu kuzitabira ari benshi kandi bakazaza biteguye guhemburwa, akomeza agira ati: “Icyo nababwira ni ukubasaba kuzaza bambaye imyambaro yoroheje kuko tuzabyina, tuzaramya, nyine bizaba bimeze neza cyane.”

Yavuze ko icyo abazitabira bakwiriye kwitega ari umuteguro udasanzwe bamaze igihe bakora ndetse no kumva indirimbo nshya, naho ku ruhande rwe yatangaje ko yiteze kuzabona abantu bahemburwa ku bwo kuramya Imana kandi ashimangira ko yizeye ko ibyo bizabaho cyane.

Kwinjira muri iki gitaramo kizabera i Masoro ku bantu bose bashaka kuzifatanya na Arsene Tuyi ni ubuntu, kuko ashaka korohereza ababyifuza bose kuhagera ntawe uzitiwe no kubura ubushobozi bwo kwigurira itike igomba kumwinjiza.

Indi mpamvu yatumye Arsene yorohereza abantu kwinjira mu gitaramo cye ku buntu, ni uko ateganya kuzakoreramo isuzuma ry’amashusho y’indirimbo nshya azaririmba muri iki gitaramo ziri kuri album azakorera ‘Live recording’ muri Kanama uyu mwaka.

Igitaramo ‘Pentecost Hymn’ kigiye kuba ku nshuro ya gatanu, cyatangiye kuba mu 2018, aho Arsene Tuyi yari yiyambaje abandi baramyi n’amakorali akomeye barimo Patient Bizimana, Gaby Kamanzi, Christian Irimbere, Shekinah Worship team ya Masoro na Shining Stars Family. Muriki gitaramo, niho Arsene yanamurikiye album ye ya mbere yise 'Umujyi w'amashimwe.' 

Mu 2018 nabwo iki gitaramo cyarabaye ndetse no mu 2019, bigeze mu 2020 icyorezo cya Covid-19 gikoma mu nkokora ibikorwa byose mu Rwanda, ariko ubwo cyagenzaga macye mu mwaka 2022 iki gitaramo cyaje kugaruka ndetse no mu 2023 kiraba.

Ushaka gushyigikira umuramyi Arsene Tuyi mu myiteguro y’igitaramo cye, wakohereza inkunga yawe kuri kode: 502726, cyangwa ugahamagara nimero ya telefoni igendanwa: 0788405303.

Incamake ku mateka ya Arsene Tuyi ugiye kongera gutaramira abanyarwanda

Arsene Tuyi yahawe umugisha wo gukurira mu nzu y’Imana, aho usanga mu buto bwe yarajyaga mu ishuri ry’abana ryo ku cyumweru (Sunday school) muri ADEPR ari na ho yatangiriye kuririmba muri korari y’abana. 

Mu busore bwe yatangiye guteranira mu itorero ry’isanamitima (Evangelical Restoration Church) muri paruwasi ubu yitwa iya Masoro ari na ho akiri kugeza ubu. 

Aha muri iri torero yakoreye umurimo w’Imana muri Shining Stars na Shekinah Worship team, ku bw’ubuntu bw’Imana akaba ari umwe mu bayobora kuramya no guhimbaza Imana bahesha umugisha benshi. 

Uyu muramyi kandi ari mu batangije itsinda ryiswe Salvation Proclaimers ryateguraga ibitaramo bitandukanye byo kuramya no guhimbaza Imana.

Muri 2016, Arsene Tuyi ni bwo yatangiye neza kuba umuhanzi ku giti cye mu gusakaza ubutumwa bwiza bwa Yesu Kristo ndetse akomeza no kugenda atera imbere mu buryo bw’umwuka n’ikinyamwuga aho wasangaga akomeza kwiga ibicurangisho bimwe na bimwe nka gitari ndetse no kwiga inyigisho z’abigishwa ba Yesu Kristo mu ishuri ryitwa 'Bible Communication Center (B.C.C)' akaba yarazisoje muri 2017. 

Mu mwaka kandi wa 2016 ni ho Arsene Tuyi yahawe igihembo na Groove Awards Rwanda nk'umuhanzi mushya w’umwaka mu ruhando rw’abahanzi baririmba indirimbo zo kuramya no guhimbaza Imana bakoze cyane muri 2016.

Arsene Tuyi agiye gukora igitaramo kizahembukiramo benshi   

Uyu muramyi agiye gukora igitaramo 'Pentecost Hymn' kigiye kuba ku nshuro ya 5

Arsene yateguje abantu kuzaza bambaye imyambaro yoroheje izatuma bashobora kubyina

Arsene Tuyi azifatanya na Christian Irimbere mu gitaramo cye

Gahunda yose y'igitaramo ni uko iteye

">

Kanda hano urebe indirimbo 'Pentecost Hymn' ya Arsene Tuyi

">