Derek ushinjwa kwica Floyd arasabwa n'urukiko ingwate ya Miliyoni $1.25 ngo arekurwe by'agatenganyo

Urupfu rwa George Floyd rwababaje benshi bitewe n'ukuntu amwe mu mashusho yagiye anyura ku mbuga nkoranyambaga yamugaragazaga ari gutakamba avuga ko atabasha guhumeka ariko umupolisi wamushinze ivi ku gikanu akagaragara nk'umuntu udashaka kubyumva kugeza aho yashiriyemo umwuka.

Uru rupfu rwabaye imbarutso y’imwigaragambo ndetse n’ibikorwa byinshi ku birabura aho bari kwereka Isi ko barambiwe akarengane bakorerwa. Tariki 8 Kamena 2020 ni bwo urukiko rwakiriye Derek Chauvin wahoze ari umupolisi mu mujyi wa Minneapolis.

Abashinjacyaha bavuze ko "Ibyo aregwa bikomeye" kandi n'umujinya wa rubanda ari nayo mpamvu ingwate yo kuba arekuwe igomba guhera nibura kuri Miliyoni imwe y'amadorari. Bwana Chauvin araregwa ubwicanyi bwo mu cyiciro cya kabiri. Abandi bapolisi batatu bari kimwe nawe nabo bararegwa ubufatanyacyaha no kureberera.

Amagambo ari gukoreshwa na benshi mu gushaka ukwishyira no kwizana ku buzima bw'abirabura ku Isi 

Ubwicanyi kuri George Floyd bwateje imyigaragambyo ahantu hatandukanye ku isi ndetse hakiyongeraho ko uru rupfu rwabaye imbarutso kuri benshi mu gusaba impinduka mu gipolisi cya Amerika.

Ku rundi ruhande, i Houston muri leta ya Texas aho  Floyd yakuriye mbere yo kwimukira i Minneapolis, ejo basezeyeho umurambo we mu gihe cy'amasaha atandatu aho wari washyizwe mu rusengero rwitwa The Fountain of Praise church.

Uyu munsi biteganyijwe ko aza gushyingurwa n'abagize umuryango we aho muri Houston. Imihango yo kumusezeraho yabaye kandi muri Minneapolisi na North Carolina aho yavukiye.

Joe Biden, umukandida w'ishyaka ry'abademokarate ku mwanya wa Perezida, ejo yagiye guhura n'abo mu muryango wa Floyd i Houston ngo abihanganishe

Ese mu rukiko byari byifashe gute?

Derek Chauvin, wamaze imyaka 19 mu gipolisi, ntabwo yari ari mu cyumba cy'urukiko ahubwo yari muri gereza hakoreshwa ikoranabuhanga ry'amashusho.

Mu iburanisha ryamaze iminota 15 ntacyo yigeze avuga, yari yambitswe amapingu n'umwambaro w'ibara rya 'orange' yicaye imbere y'ameza matoya. Umucamanza Jeannice M Reding yavuze ko ingwate yo kugira ngo arekurwe by'agateganyo ayishyize kuri Miliyoni 1.25 y'amadorari

Umunyamategeko umwunganira ntabwo yaburanye kuri icyo giciro. Bwana Chauvin w'imyaka 44 ubu afungiye muri gereza ya Minnesota yitwa Oak Park Heights, nyuma yo kwimurwa inshuro nyinshi. Azongera gusubira mu rukiko tariki 29 z'uku kwezi kwa Gatandatu

Ni ibihe byaha aregwa?

Derek Chauvin aregwa ibyaha bitatu:

1.       Ubwicanyi butagambiriwe bw'icyiciro cya kabiri, iki cyaha gihanishwa imyaka 40 y’igifungo.

2.      Ubwicanyi bw'icyiciro cya gatatu, iki cyaha gihanishwa imyaka 25 y’igifungo.

3.      Ubuhotozi bw'icyiciro cya kabiri, igihano cyabyo gishobora kugera ku myaka 10 y'igifungo

Magingo aya, ni ibi byaha aregwa gusa hari ibindi birego bishobora kuzanwa ariko biboneka ko ashobora kutazaregwa ubwicanyi bwo mu cyiciro cya mbere kuko abamushinja byasaba ko berekana ko yari yabanje gucura uwo mugambi, kuwugerageza n'impamvu nk'uko bivugwa n'ibiro ntaramakuru Associated Press.

Inama y'ubutegetsi y'umujyi wa Minneapolis yatoye itegeka ryo guca uburyo polisi yari yemerewe bwo gufata ukekwa agatabwa ku munigo no kumushinga ivi ku ijosi, banasabye ko habaho gusesa igipolisi.

Mu Bufaransa, ahabaye imyigaragambyo ya 'Black Lives Matter' (ni ukuvuga ngo ubuzima bw'abirabura bufite agaciro) mu mpera y'icyumweru gishize, Minisitiri w'ubutegetsi bw'igihugu Christophe Castaner yatangaje ko polisi itazongera gufata abantu mu ijosi.

Abaharanira uburenganzira bwa muntu mu Bufaransa bavuga ko mu mwaka ushize gusa hari ibirego 1,500 byatanzwe birega abapolisi ubugizi bwa nabi.

Src: bcc, nytimes