Prophet Sultan Eric uyobora Itorero River Of Joy and Hope Ministries ryahoze ryitwa Zeal of the Gospel, yabwiye abana bo ‘kwa Gisimba’ bibumbiye mu muryango “One help one Direction Ihumure”, ko n’ubwo ari imfubyi bakwiye kuzirikana ko kuba baravutse atari impanuka ahubwo Imana ishaka kubakoresha kugira ngo bamurikire u Rwanda n’Isi.
Ibi Prophet Sultan Eric yabibabwiye ubwo yasangiraga nabo umunsi Mukuru w‘Umuganura’ kuri uyu wa Gatanu tariki 02 Kanama 2019. Ni mu gikorwa cyateguwe na Impact Ministries ibarizwa mu Itorero River Of Joy Ministries rikorera i Nyamirambo Cosmos kuri KN 160st av.
“One help one direction Ihumure” ubarizwamo abana bo ‘kwa Gisimba’, ni umuryango ukora ubuvugizi ku bana batishoboye; watangiriye kuri porogaramu “Smile Sunday” yakurikiranye bya hafi ubuzima bw’abana bo mu muhanda ndetse n’abigeze kuba mu muhanda.
Prophet Sultan yabwiye abana ko Imana ibakunda kandi ko batavutse ku bw’impanuka ahubwo ko Imana yabazanye ku isi kugira ngo bagirire umpumaro u Rwanda n’isi yose, ababwira ko Imana ibafiteho umugambi mwiza.
Yanababwiye ko bakwiye guharanira kwiga yaba mu mashuri yashyizweho na Leta n’andi ariko kandi bakiga umunsi ku munsi Ijambo ry’Imana kuko rizababera akabando bicumba mu buzima bwabo. Ati:
Twaje kubahereza ibyiringiro no kubabwira ko ejo hanyu ari heza…Naje kubabwira ko Imana ibakunda. Ntabwo mwavutse ku bw’impanuka ahubwo Imana yabazanye hano ku isi kugira ngo muzabe umpumaro ku gihugu no ku isi yose. Imana ibafiteho umugambo wo kuzabakoresha.
Prophet Eric Sultan yababwiye ko ibintu bibiri bizafasha kugera kure mu buzima ari ukumenya ko bataje ku isi ku bw’impanuka ahubwo ko bakwiye kuzirikana y’uko Imana yabazanye ku isi ifite impamvu yo kubakoresha bakagirira akamaro u Rwanda n’isi.
Yanababwiye ko Imana yabazanye ku isi kugira ngo bazane impinduka itandukanye n’iriho ubu. Yongeraho ko Imana yabazanye ku isi kugira ngo bagire neza isi kurusha uko bayisanze. Yasezeranyije abana bana ko bazakomeza kubakorera ubuvugizi ndetse bakabaha n’ubundi bufasha bwose nkenerwa mu buzima bwa buri munsi
Prophet Sultan yasangiye 'Umuganura' n'abana bo 'kwa Gisimba'
Prophet Sultan yabwiye INYARWANDA, ko bahisemo gusura aba bana kugira ngo babereka urukundo ariko kandi banabwire ko Imana ibakunda. Yavuze ko iki ari kimwe mu bikorwa basanzwe bakora nk’Itorero kandi ko bifite ingengo y’imari yabigenewe.
Amani Rene Pacifique Umuyobozi w’Umuryango “One help one direction”, yatangarije INYARWANDA ko ari iby’igiciro gikomeye kuba ku munsi w’Umuganura hari ababazirikanye bakawusangira, ashima byimazeyo Itorero River Of Joy and Hope Ministries. Yagize ati:
Ni igikorwa cyiza ubusanzwe tugira abashyitsi ariko biba akarusho ari abashyitsi baje ku munsi ufite igisobanuro. Turabizi ko hirya no hino mu gihugu abantu bagize igikorwa cyo kwizihiza umunsi Mukuru w’umuganura ariko kuba Itorero na Sultan ubwe batekereje kudusura, ni ikintu cyadukoze ku mutima nk’abayobozi b’abana. Kandi nk’abana kuba basangiye bakagira icyo bafata ni ikintu cyiza cyane. Twabyakiriye neza.
Impact Ministries yateguye iki gikorwa cyo gusangira ‘Umuganura’ n’abana bo ‘kwa Gisimba’ ikorera muri River of Hope and Joy Ministries ikaba yibanda cyane kugutegura ibitaramo by’urubyiruko ruva mu matorero atandukanye agahurira hamwe akiga ku ijambo ry’Imana buri wa Gatanu.
Ni ihishurirwa ry’umuhanzi Billy Irakoze akaba ari nawe muyobozi wayo Mukuru. Igizwe n’abantu barindwi ikaba imaze amezi abiri ivutse. Iki ni igikorwa cya kabiri cy’urukundo bakoze kuva yashingwa.
Impact Ministries kandi inategura ibiganiro ku ngingo zitandukanye nk’urushako, iterambere ry’urubyiruko aho ihuriza hamwe abantu batandukanye haba mu mideli, muzika, inararibonye mu mibanire y’abashakanye n’ibindi intego ari ugutinyura urubyiruko ngo rugire ejo hazaza heza hubakiye ku ijambo ry’Imana.
Byari ibyishimo ku bana basangiye 'Umuganura' na Prophet Sultan
Sultan yaherekejwe na bamwe mu bo mu Itorero rye
Amani Eric (ubanza ibumoso) Umuyobozi w'Umuryango "One voice one direction Ihumure"
Bamwe mu bagize 'Impact Ministries'
Eng
RSS 
TANGA IGITECYEREZO