Muri iki gihe, iyo utembereye mu bice bitandukanye by’igihugu, yaba mu ma Bus cyangwa mu modoka z’abantu ku giti cyabo, yewe n’ahahurira abantu benshi bakunda imikino, usanga bakurikiye ikiganiro Urukiko cya Radio10, gikorwa guhera saa 10h00’-13h00’. Gusa iki kiganiro kiyoboye ibindi mu gukundwa na benshi gishobora kuba kiri mu marembera.
Abakunda iki kiganiro bavuga ko bagikundira ko bahabona amakuru bataba babonye ahandi, bigatuma hari icyo bunguka ndetse baba bifuza kumenya mu mikino itandukanye, icyo bo bise ukuri. Iki kiganiro gikorwa n’abanyamakuru b’inzobere, bayobowe na Sam Karenzi, Kalisa Bruno Taifa, Kazungu Clever ndetse na Axel Horaho.
Ku mugoroba wo kuri uyu wa Kane tariki ya 03 Kamena 2021, ku mbuga nkoranyambaga hacicikanye amakuru avuga ko Abanyamakuru bakoraga ikiganiro urukiko bategetswe ku ngufu n’ubuyobozi bukuru bw’iki gitangazamakuru kurekura 'Micro' z’iki kiganiro nyuma y’igitutu gikomeye bamazeho igihe kitari gito kubera inkuru batangaza zibabaza abatari bacye, ariko ku rundi ruhande zigashimisha abafana n’abakunzi b’imikino babakurikira.
Bivugwa ko ubuyobozi bw’iki gitangazamakuru nabwo bwabisabwe n’abayobozi ba Minisiteri ya Siporo, kubera ko iki kiganiro hari ibyo kitubahiriza. Bivugwa ko ubuyobozi bwa Radio10 bwahise bufata icyemezo cyo gukura aba banyamakuru muri iki kiganiro, bubashakira indi mirimo kuri iki gitangazamakuru, gusa bagejejweho umwanzuro wabafatiwe, babiteye utwatsi bafata icyemezo cyo kwandika basezera.
Ubuyobozi bwa Radio10 bwabwiye abanyamakuru bakora ikiganiro cy’Urukiko ko guhera tariki ya 01 Nyakanga 2021, batazongera gukora iki kiganiro, gusa biravugwa ko nabo bahise bandika amabaruwa asezera akazi.
Mu kiganiro umwe mu banyamakuru bakora ikiganiro Urukiko cya Radio10 yagiranye na InyaRwanda.com mu gitondo cyo kuri uyu wa Gatanu, yavuze ko ikiganiro kitahagaritswe nk'uko benshi bari kubivuga, gusa yadutangarije ko hari impinduka zakozwe n’ubuyobozi bwa Radio10.
Yagize ati ”Ntacyo natangaza aka kanya! Gusa ntabwo ikiganiro cyahagaritswe kuko no mu kanya tugiye kujya kuri 'Micro', gusa hari impinduka zakozwe n’ubuyobozi bukuru bwa Radio ntafitiye uburenganzira bwo gutangaza”.
Ikiganiro Urukiko cyatangiye gutambuka kuri Radio10 mu 2019, gikorwa n’abanyamakuru bashya bose bahuriye kuri iki gitangazamakuru bavuye ahandi, bazana umuvuno utandukanye n’uwari umenyerewe mu bindi biganiro by’imikino bitandukanye.
Kugeza magingo aya ntiharamenyekana ahazaza h’iki kiganiro gikomeje kuvugisha abatari bacye mu Rwanda, dore ko twagerageje no kuvugisha ubuyobozi bwa Radio10 kugira ngo bagire icyo bubivugaho ariko ntibyakunda.
Eng
RSS 
Axel Horaho, Kazungu Clever, Kalisa Bruno Taifa na Sam Karenzi bari bagize itsinda rikora ikiganiro Urukiko cya Radio10
TANGA IGITECYEREZO