Itegeko ryo guca TikTok muri Leta Zunze Ubumwe z'Amerika ryemejwe

Kuwa Kabiri w'iki cyumweru tariki 23 Mata 2024 n ibwo Inteko ya Leta Zunze Ubumwe z'Amerika yemeje umushinga w'itegeko utavugwaho rumwe ushobora guca burundu TikTok  muri Amerika.

Iri tegeko ryahaye imbuzi kompanyi y'Abashinwa yitwa ByteDance ifiteTikTok, ko ihawe amezi icyenda (9) yo kugurisha imigabane yayo cyangwa uru rubuga rugahagarikwa burundu muri Amerika. Ni ukuvuga ko ByteDance nirenza amezi 9 itaragurisha TikTok ngo ive mu biganza byayo, izahita icibwa muri Amerika.

Uyu mushinga w'itegeko ugiye gushyikirizwa Perezida wa Amerika, Joe Biden, uherutse kuvuga ko ntakabuza azashyira umukono kuri iri tegeko rikimara kugezwa ku meza ye.

Iki cyemezo cyemejwe mu rwego rw’imishinga y'amategeko ane yarimo imfashanyo za gisirikare zagenewe Ukraine, Israel, Taiwan ndetse n’abandi bafatanyabikorwa b’Amerika muri Indo-Pasifika.

Uyu mushinga w'itegeko wabonye y’abadepite hamwe n’abasenateri 79 bayitora naho 18 barayirwanya.

Mu cyumweru gishize, isosiyete ya TikTok yavuze ko uyu mushinga w'itegeko "uzahonyora uburenganzira bwo kuvuga mu bwisanzure bw'Abanyamerika miliyoni 170, gusenya imishinga miliyoni zirindwi, no guhagarika urubuga rutanga miliyari 24 z'amadolari mu bukungu bwa Amerika, buri mwaka."

Umuyobozi mukuru wa TikTok, Shou Zi Chew, mu kwezi gushize yari yavuzeko iyi sosiyete izakomeza gukora ibishoboka byose harimo no gukoresha "uburenganzira bwemewe n'amategeko" mu kurinda uru rubuga.

Uyu mushinga w'itegeko ryo guca TikTok muri Amerika wemejwe, mu gihe inteko yari yaratangaje ko impamvu bifuza guca uru rubuga ari uko kompanyi ByteDance ifite TikTok, ikorana na leta y'Ubushinwa mu gukusanya amakuru y'abanyamerika babinyujije kuri uru rubuga.