Yatoje Kaminuza y'u Rwanda atwara CECAFA ayikuye hanze: Ruremesha Emmanuel wahawe Mukura ni muntu ki?

Ruremesha Emmanuel ni umwe mu batoza bakomeye bamaze igihe muri shampiyona y'u Rwanda, ni umutoza uzwiho gutungurana atsinda amakipe akomeye ariko akaba atarabasha gutwara igikombe nk'umutoza ukomeye. Ruremesha Emmanuel ni umwana wa Kabiri mu muryango w'abana batanu barimo babiri bishwe muri Jenoside yakorewe Abatutsi mu 1994. 

Ruremesha Emmanuel ubu ni we mutoza mukuru wa Mukura 

Ruremesha Emmanuel yavukiye ku Mumena, yize amashuri abanza kuri EP Cyivugiza, ayasoreza kuri Camp Kigali mu karere ka Nyarugenge. Yakomereje amashuri yisumbuye mu Burundi Kigoma, nyuma ya Jenoside yakorewe Abatutsi yaje gusoreza amashuri yisumbuye kuri Et Muhazi mu ishami ry'ubucungamari n'ubucuruzi.

Mu mupira w'amaguru Ruremesha ni muntu ki?

Ruremesha Emmanuel wakinishaga akaguru k’iburyo ahagana inyuma ku ruhande, yatangiye gukina ubwo yakiniraga ku Mumena nyuma ajya mu ishuri ry'umupira rya Panthere mu 1989 avamo ajya mu irerero rya Rayon Sports yatozwaga na Nsoro. 

Kubera kwiga, Ruremesha Emmanuel yerekeje muri Congo ariko akajya aza mu myitozo kwa Viguri mu karere ka Rubavu. Mu 1992 Ruremesha yagiye kuba i Burundi yerekeza mu ikipe ya Coca-cola FC yo Mu buyenzi, avamo yerekeza mu ingimbi za Vital'O.

Nyuma ya Jenoside yakorewe Abatutsi, yagarutse mu Rwanda yerekeza mu ikipe ya Mukura Victory Sport ayikinira kuva mu 1995 kugeza mu 2002. Aganira na Imvaho Nshya, Ruremesha yatangaje ko muri Mukura ahita mu rugo kubera ukuntu bamwakiriye. Yagize ati: “Muri Mukura baranyakiriye banshyira mu ikipe, ni ahantu ntazibagirwa n'ubwo tutatwaye igikombe ariko ni ahantu h'ingenzi."

Muri Mukura niho yatangiriye akazi k'ubutoza, kuko mu 2003 yahawe inshingano zo gutoza abana ndetse anabifatanya no gutoza ikipe ya kaminuza y'u Rwanda yahoze ari (UNR).

Nyuma y'umwaka umwe gusa Ruremesha yabaye umutoza mukuru wa Mukura yari iya nyuma ku rutonde rwa shampiyona n'inota rimwe mu mikino ine, umukino wakurikiyeho yahise atsinda Kiyovu Sport yari iri ku mwanya wa mbere n'amanota 12, ayitsinda ibitego 3-0.

Ibihe bibi muri Mukura.

Nyuma y'imyaka ibiri gusa, Ruremesha yaje kwirukanwa ubwo Mukura yari ku mwanya wa 8. Nyuma Ruremesha yatangaje ko kwirukanwa muri mukura ari ikintu cyamutunguye. Ati: “Kuva muri Mukura byarantunguye kuko numvaga ndi mu muryango ni bya bindi by'ikipe yakureze abantu ntibakwemera. Sinjye wari umaze kugira umusaruro mubi kurusha abandi." 

Mu 2007 Ruremesha yerekeje muri Kibuye FC aho yamenyaniye na Nyakwigendera Jean Marie Ntagwabira bavanye mu mahugurwa muri Gabon. 

Icyo gihe Jean Marie yifuje kumujyana muri APR FC kuko yageze i Kigali agasanga APR FC yarazanye umutoza mukuru Andy Mfutila. 

Mu 2008 Jean Marie Ntagwabira yabaye umutoza wa Atraco FC asaba Ruremesha kumubera umutoza wungirije, bamarana umwaka umwe, muri icyo gihe mu 2009 batwaranye igikombe cya Shampiyona, icy'amahoro ndetse na CECAFA bakuye hanze.

Muri Atraco FC yavuyemo yerekeza muri Rayon Sports, naho avamo ajya muri Le Jeunesse naho yavuye agaruka muri Mukura victory Sport mu 2013 avayo ajya muri Espoir FC ntiyahatinda yerekeza muri Gicumbi ayivamo ajya muri Etincelles ayihesha umwanya wa Kane. Yahavuye ajya i Musanze FC aza guhagarikwa yerekeza muri Kiyovu Sport yavuyemo ajya muri Gorilla FC akaba ari nayo yatozaga mbere y'uko asinya muri Mukura Victory Sport kuri uyu mugoroba.